Maer ick ben nv langhe (my seluen vergeten hebbende ) ouer de palen ghesprongen. Hoewel ist datter yet schijnt te dertelick oft clapperlick ghesproken te zijne so denckt dattet de Sotheyt ende oock een wijf gesproken heeft: maer nochtans hierentusschen ghedenct dat Grieckx Spreecwoort, Dickwils heeft oock een Sot man bequame dinghen ghesproken: ten sy dat ghy mueghelick meynt, dat dit de wijuen niet aen en gaet. Ick sie dat ghy de Sluytreden verwacht: maer ghy zijt veel te Sot, ist dat ghy meynt dat ick oock noch ghedachtich ben wat ick gheseyt hebbe, dewijle ick soo groot een mengsel der woorden hebbe wtgestort. Dat is een out Spreecwoort, Ick hate eenen ghedachtighen mededrincker: Dit is een nieu, Ick hate eenen gedachtigen hoorer. Daerom, O ghy vermaerde Priesters der Sotheyt, vaert wel, bewijst dattet v behaecht, leeft, ende drinct.
